Maiatza 2023
Ekintzailetza norbere kabuz negozio bat martxan jartzean datza. Leartibai Fundazioan ekintzailetza lanerako beste aukera bat izan daitekeela uste dute, eta enplegagarritasun pertsonala hobetzeko bide bat. Are gehiago, ekintzailetzak malgutasuna, autonomia eta asetasuna ematen ditu. Ekintzaile bat motibatuta dago gustuko duena egiten ari delako eta kontrola berak duelako, eta horrek garapen pertsonala eta profesionala ematen dizkio.
Ekintzailetzaren adibide argiak dira Lea-Artibain urtero norberaren kontura ekiteko erabakia hartzen duten pertsonek sortzen dituzten negozioak. Iaz, 2022an, 21 enpresa berri (27 lanpostu) sortu ziren, eta aurten, urte hasieratik orain arte, 14 enpresa berri sortu dira dagoeneko. Kasu honetan, enpresa horiek txikiak dira, mikroenpresak, hau da, lanpostu bakarrekoak.
Leartibai Fundazioak ekintzaileei zuzendutako zerbitzu propioa du. Fundazioko teknikariak negozio berrien sorreran bidelagun aritzen dira. Negozio-ideia ondo definitzeko behar duten laguntza ematetik hasita, enpresa sortzen laguntzen diete ekintzaileei, baita negozioaren lehen urteetan ere. Teknikarien helburua enpresa berri horiek merkatuan modu errazagoan finkatzen laguntzea da, haien bidea erraztuz. Ekintzaile izatea “hutsik dagoen igerileku batera salto egitea bezala da” adierazi dute behin baino gehiagotan zerbitzuaren erabiltzaileek, baina behin norbere helburuak bete eta negozio propioa martxan jarri eta jarraipena duela ikustean lortzen duten poza eta gogobetetze-maila izugarria da.
Bakarrik lan egiten duten ekintzaileentzat, batzuetan gakoa beste pertsona batzuekin elkarlana egitea da. Jardueraren eta merkatuaren eskaeren arabera, beharrezkoa da ekintzaileek lankidetzan aritzea. Lea-Artibai Berrikuntza Gunean kokatutako Enpresa Haztegiaren bitartez, Leartibai Fundazioak lankidetza eta sinergia aukerak eskaintzen dizkie enpresa horiei, adibidez, programa ezberdinak abiaraziz eta coworking espazioak ahalbidetuz. Era berean, Fundazioko teknikariak elkarlanerako uneak eta espazioak sortzen saiatzen dira, ekintzaileak bildu eta dinamika desberdinetan parte har dezaten.
Hainbat zerbitzu, lankidetza-aukera eta finantzaketa-aukera eskaintzen dira ibilbidean zehar, eta Leartibai Fundazioan ibilbide hori errazteko lan egiten dute, urtez urte zerbitzuak ekintzaileei eta sortzen diren beharrei egokituz eta berrituz.