Urria 2024
Leartibai Fundazioak aktiboki parte hartzen du jardunaldi, hitzaldi zein bileretan bai Lea-Artibai mailan, baina baita eskualdetik kanpo ere. Azken hilabetean, ekintzailetza, talentu eta merkataritzako ekosistemen baitan, lurraldeko beste eskualde batzuetan egindako hainbat topaketatan egon da.
Ekintzailetza-ekosistemaren esparruan, SAREKIN SAREAren II. Gosarian parte hartu zuen, Bizkaian autoenpleguaren arloan lanean diharduten beste erakunde batzuekin batera. Bertan, ekintzailetza-kultura izan zuten ardatz. Sarekin Bizkaiko ekintzailetzaren alde lan egiten duen sarea da, eta lurraldeko ekintzailetza-ekosistemako eragileek osatzen dute, Leartibai Fundazioa barne.
Era berean, inguruko eskualdeetan egiten diren ekintzailetza-ekitaldietan egon da, hala nola, UBAI UP!, Urdaibaiko ekintzailetza-ekosistemaren barruan egiten den urteroko hitzorduan.
Horrez gain, ekintzailetzan gaur egun dauden joerak kontuan hartuta eta etorkinen ekintzailetzarako joerari zerbitzu erabilgarria emateko helburuarekin, horri buruzko hainbat prestakuntza-topaketatan izan da.
Merkataritza-arloari dagokionez, Fundazioak hainbat jardunaldi eta prestakuntza-saiotan parte hartu du, zerbitzu eguneratua eta hainbat eragilerekin lankidetzan eskaintzeko helburuarekin:
- Retail Euskal Eskolaren IV. Kongresua.
- XVIII Urban Commerce Jardunaldia.
- Merkataritza Bulego Teknikoa izanik, hainbat prestakuntza-saio izan ditu azken hilabeteetan.
Jardunaldi eta saio horietan, merkataritza-sektoreak eraldaketa digital eta jasangarriaren esparruan eman behar duen jauzia nabarmendu dute behin eta berriz.