Otsaila 2026 –
Otsailean, Bizkaiko Foru Aldundiko Garraio, Mugikortasun eta Turismo Sailak Bilbao Bizkaia Action Group (BBAG) lantaldearen barruan sustatutako turismo industrialari buruzko bi topaketatan parte hartu dugu, Bizkaia helmuga turistiko industrial gisa kokatzeko eta jarduera ildo berriak aztertzeko.
BBAG Bizkaiko Foru Aldundiak sustatutako gobernantza-organo bat da, turismoaren arloan lankidetza publiko-pribatua bultzatzeko. Organo horren eginkizun nagusia sektoreko eragileak koordinatzea da, Bilbo-Bizkaia helmugako turismo-politikak garatzeko, gauzatzeko eta horien jarraipena egiteko.
Lehen topaketak helmuga turistiko industrialean jarri du arreta, eta Leartibai Fundazioak gure eskualdea eztabaida estrategikoaren barruan kokatzeko eta bere ondare industriala aldarrikatzeko parte hartu du saio honetan. 10 dira Bizkaian bultzatutako produktu turistiko industrialak, eta horietako bat da Lea Artibai ibilbidea.
Bigarren topaketan, BFAko turismo zuzendaritzaren 2026ko ekintza plana ezagutzeko aukera izan dugu, Sonia Perez Ezquerra foru diputatuaren eta Leire Sáez Rios turismoko zuzendari nagusiaren eskutik. BBAG, Txakolina, Landa Turismoa, konektibitatea, turismo inklusiboa (irisgarria), erosketa arduratsuen turismoa eta industria turismoa taldeetan egingo diren ekintzak aurkeztu dira.
