Maiatza 2026
Lea Artibaiko 10 turismo-enpresak Leartibai Fundazioak bultzatutako elkarlaneko programa batean parte hartu dute, komunikazio digitala hobetzeko eta helmugaren ikusgarritasuna indartzeko helburuarekin.
“Hobeto komunikatu bisitari gehiago erakartzeko” ikuspegiarekin, ekimenak eduki digitalen lanketa eta irisgarritasunaren hobekuntza uztartu ditu; biak ala biak funtsezkoak gaur egun, bidaiatzeko erabakia hein handi batean interneten bidez eraikitzen baita.
Helmuga bat aukeratu aurretik, bidaiariek informazioa bilatzen dute, aukerak alderatzen dituzte eta webguneak kontsultatzen dituzte, batez ere mugikorretatik. Testuinguru honetan, edukien argitasuna, nabigazioaren erraztasuna eta prozesu digitalen sinpletasuna erabakigarriak dira. Elementu horiek huts egiten dutenean, oztopoa bisitaria helmugara iritsi aurretik sortzen da.
Abiapuntua: negozioaren nortasuna mantenduz eskualde mailako narrazio partekatua egitea
Programaren abiapuntua ideia sinple bat izan da: hainbat enpresaren artean komunikazio gaiak eta uneak koordinatzea, negozio bakoitzak bere nortasuna mantenduz baina eskualde mailako narrazio partekatu bati esker pertsona gehiagorengana iristeko.
Horretarako, maiatzaren 7an hiru orduko lan-saio bat egin zen, eta bertan enpresek gai komunak eta edukiak lantzeko egutegi partekatu txiki bat definitu zituzten. Saio horrek mezuak lerrokatzeko eta helmugaren komunikazio koherenteagoa lortzeko bidea eman zuen.
Gainera, prestakuntzan zehar irisgarritasun digitalarekin lotutako alderdi praktikoak landu ziren, ikuspegi sinple eta aplikatu batetik. Besteak beste, honako gaiak jorratu ziren: informazioaren argitasuna, mugikorretan ondo ikustea, formularioen sinplifikazioa edo edukiek kontaktua eta erreserbak errazteko duten gaitasuna.
Prestakuntza amaitu ondoren, parte hartu duten enpresek aholkularitza pertsonalizatua jasoko dute. Laguntza horri esker, enpresa bakoitzaren webgunea eta kanal digitalak zuzenean lantzeko aukera izango dute, hobekuntza zehatzak, lehentasunezkoak eta bakoitzaren errealitatera egokituak proposatuz.
Helburua da enpresek hobekuntza aukerak identifikatzeaz gain, benetako aldaketak aplikatzea, beren presentzia digitala indartuz eta bisitariak erakartzeko eta bihurtzeko gaitasuna handituz.
Elkarlaneko lanaren eta laguntza pertsonalizatuaren konbinazio honek aukera emango die enpresei dagoeneko egiten duten ahalegina hobeto aprobetxatzeko, erabiltzaileen esperientzia hobetzeko eta Lea Artibai helmugaren ikusgarritasuna indartzeko.
Programa amaitzeko, ondorio nagusiak jasoko dituen txosten bat egingo da, etorkizunean komunikazio eta irisgarritasun digitalaren arloan egingo dituzten ekintzetarako oinarri izango dena.