Maiatza 2026
Leartibai Fundazioak urratsak ematen jarraitzen du Lea-Artibai eskualdean hiri-ekonomia eredu lehiakor eta jasangarriago bat bultzatzeko Plan Estrategikoaren definizioan. Ikertaldek duela gutxi aurkeztutako diagnostikoaren ondoren, hiri ekonomiaren etorkizuna definitzeko parte hartzean oinarritutako fase garrantzitsu batean murgildu da orain prozesu hau.
Diagnostikoa egiteko, aurretiazko datuak eta planak kontuan hartu dira, bai eta inplikatutako eragileen iritzia. Zehazki, eskualdeko merkatarien hiru elkarteekin, udal teknikariekin eta Lea-Artibai Landa Garapenarekin elkarrizketak egin dira. Era berean, herritarren ikuspegia jasotzeko asmoz, etxez etxeko telefono bidezko inkestak egin dira, baita online eta kalean egindako inkestak ere.
Bestalde, hiri-ekonomiako ehunak — saltokiak, ostalaritza establezimenduak, gremioak eta zerbitzu enpresak — ere parte hartu du, eskualdean dagoen eskaintza aztertzeko aukera eman duen online inkesta baten bidez.
Diagnostikoaren emaitzak mahai gainean jarrita, egindako azken lan saioan Lea-Artibaiko hiri garapen ekonomikorako erronka, aukera eta jarduera ildo nagusiak landu dira.
Hurrengo urratsa lan hori sektorearen ikuspegi zuzenarekin kontrastatzea eta aberastea izango da. Ildo horretan, Leartibai Fundazioak laster saio parte-hartzaile bat antolatuko du establezimenduei eta eragile ekonomikoei zuzenduta, haien ekarpenak jasotzeko eta planaren definizioan aurrera egiteko.
Lankidetza prozesu horren garrantzia azpimarratu nahi du Leartibai Fundazioak, plan hau eskualdeko udalek, sektore ekonomikoak eta Fundazioak berak partekatzen duten proiektua baita. Horregatik, prozesu horretan aktiboki parte hartzera animatzen ditugu inplikatutako eragile guztiak.
Interesa baduzu, ez izan zalantzarik gurekin harremanetan jartzeko. Prozesuan parte hartzeko beharrezko informazio guztia emango dizugu.