Maiatza 2022
Lea-Artibai eskualdeak hainbat touroperadoreren bisita jaso zuen apirilaren 27an, BFAk eta Bilbao Turismok antolatutako MATCH IN PLACE programaren barruan. Ekimenaren helburua Bizkaiko lurraldea kanpoan sustatzea da, eta aldez aurretik aurrera eramandako hainbat jardueraren azken emaitza da. Jarduera horiek mundu osoko turismo-operadoreak gure eskualdera hurbiltzea ahalbidetu dute, bereziki estrategikotzat jotzen diren helmugetakoak, gure lurraldearekin aireko konexioa dutelako. Bisitari horietako batzuk Finlandia, Portugal, Italia, Belgika, Txekiar Errepublika, Erresuma Batua edo Frantziatik etorri ziren, besteak beste.
Ekitaldian parte hartu zuten 54 touroperadoreetatik 30 inguruk gure eskualdea ezagutzeko aukera izan zuten egun euritsu batean. Hala ere, ez zuten zalantzarik izan benetakotzat jotzeko, eta oso harrera ona izan zuten aurkeztutako jardueren inguruan, eguraldia edonolakoa izanda ere.
Ondarroa eta Lekeitio bisitatu zituzten, eta Leartibai Fundaziotik haiekin egoteko eta eskualdeko baliabide nagusiak erakusteko aukera izan genuen Silken Palacio Uribarren Hotelean egin zen atsedenaldian. Gure eskualdeko turismo-zerbitzuetako enpresak eta Lekeitioko Turismo Bulegoa ere bertan izan ziren.
Deigarrien iruditu zitzaizkien baliabide eta ezaugarriak hauek izan ziren: gure eskualdearen euskal esentzia, helmugaren benetakotasuna, kostaldeko paisaia, bidezidorren sarea (GR38 Ardoaren eta Arrainaren Ibilbidearekiko interes berezia erakutsiz), enpresen jarduerak, eta, batez ere, gure herritarren izaera alai eta abegitsua, egin genituen bisitetan egiaztatu ahal izan zutena.
Bisita hau erakusleiho handia izan da Lea-Artibairentzat, eskualdea erakusteko eta merkatu turistiko nagusien eskariak eta beharrak ezagutzeko aukera paregabea izan baita. Era berean, sektorearekiko lankidetza indartzen lagundu du, helmugaren kudeaketaren ikuspegitik.
