Azaroa 2022
Lea-Artibai eskualdeko 14 enpresa berrik 76.000 €-ko laguntza jaso dute Bizkaiko Foru Aldundiaren EKIMEN EKINTZAILEEN SUSTAPENA 2022 programari esker. Programa horren helburua da Bizkaian enpresa berri bat martxan jartzeko eta horren funtzionamendurako laguntza ematea.
Enpresa onuradunen tipologiari dagokionez, 4 zerbitzu-enpresak izan dira, 6 ostalaritzakoak eta gainerako 4ak merkataritzakoak. Izaera juridikoa kontuan hartuta, % 70 inguru autonomoak dira, eta gainerako % 30, berriz, ondasun-erkidego eta kooperatiba motakoak.
Enpresa horiek Leartibai Fundazioa izan dute bidelagun beraien proiektu berritzaileak garatzeko orduan. Formakuntza eta banakako aholkularitza jaso dute fundazioaren eskutik; hau da, enpresa-kudeaketaren esparruko oinarrizko kontzeptuak landu dituzte, hala nola merkataritza-eremua, arlo ekonomikoa, izaera juridiko desberdinen ezaugarriak, sorrera tramiteak, laneko arriskuen prebentzioa, ingurumena, eta abar. Ondoren, ekintzaile bakoitzak bere enpresa-proiektuan ikasitakoa aplikatu behar izan du, bere negozio-ideiaren bideragarritasun-plana garatuz.
Leartibai Fundazioaren laguntza
Ekintzaile bakoitzak fundazioko teknikarien aholkularitza jasotzen du ibilbide osoan, bere negozioa definitzetik hasita eta enpresa sortzeko fasera arte egin beharreko hurrengo urratsetan.
Fundaziotik negozioaren inguruko hainbat aurreikuspen egiten laguntzen zaie: merkatuan izan dezakeen harrerari buruz, negozioaren bideragarritasuna, saldu beharreko kopuruen kalkulua, lehiakideengandik nola bereizi, negozioak izan behar duen estrategiaren diseinua, komunikazio-planaren definizioari buruz, eta abar. Horretaz gain, dirulaguntzak izapidetzeko prozesuekin laguntzen zaie, negozio berrirako bidea errazteko, bai sortze-fasean, bai hurrengo hilabeteetan.
Fundaziotik eskaintzen zaien aholkularitza guztiz pertsonalizatua izaten da. Era berean, Berrikuntza Gunean dagoen Enpresa Haztegian kokatzeko aukera ere ematen zaie enpresa sortu berriei, alokairu tarifa abantailatsuekin. Enpresa berrien sorrera – Leartibai Fundazioa
