Iraila 2023
Leartibai Fundazioak Europako proiektu berri bat jarri du abian SYSTOUR INTERREG EUROPE (Systemic approach for sustainable tourism strategies in rural areas). Proiektua Politecnico di Torino erakundearen Arkitektura eta Diseinu Sailak garatu du eta Interreg Europako proposamenen deialdiaren irabazle izan da.
SYSTOUR Politecnico di Torino erakundeak zuzenduko du bazkide nagusi gisa eta beste 6 erakunde bazkide publiko eta pribatu izango ditu; horien artean Leartibai Fundazioa. Horrez gain, Europako 6 herrialdetako (Italia, Espainia, Frantzia, Hungaria, Polonia eta Finlandia) 90 erakunde/pertsona laguntzaile baino gehiago ere arituko dira elkarlanean.
Lau urteko iraupena duen proiektu hau ofizialki 2023ko martxoaren 1ean hasi zen eta 2027ko maiatzaren 31n amaituko da. Bere helburu nagusia turisten fluxuak balioztatu gabeko landa-eremuetara eramatea eta proiektuko testuinguruen berezitasunak azpimarratzea da, eremu bakoitzeko fluxuetan oreka bilatuz eta eremuak mugikortasun jasangarriaren, konektibitate digitalaren eta eremu batek eskain ditzakeen benetako esperientzien bidez lotuz.
Proiektuan zehar, partaide diren eskualdeen 6 Diagnostiko Integral egingo dira. Ondoren, oinarriak ezarriko dira herritarren bizi-kalitatean eragin positiboa zehazteko, lurraldeen garapen jasangarria ahalbidetzeko. Lurralde-eragileen parte-hartzeak eta eskualdeen arteko esperientzien trukeak lurralde-garapenerako tresna politikoak sortzen lagunduko du.
Jarduerak hiru fasetan banatzen dira (fase nagusia, jarraipen-fasea eta itxiera-fasea):
- Turismo jasangarria sustatzera bideratutako 30 Jardunbide Politiko On partekatzea. 6 Lurralde-bisitetan aurkeztuko dira (bat herrialde bazkide bakoitzeko).
- 6 Inkesta Integral garatzea, hautatutako eskualdeetako turismo-sektorearen egoera eta herrialde bazkide bakoitzeko politika aktiboak ulertzeko, eta hutsune politikoak identifikatzea.
- Garatu beharreko politikei buruzko jarraibideak dituzten bide-orri politikoak zehaztea.
Komunikazioari dagokionez, hauek izango dira zereginak: 6 Eskualdeko Hedapen-ekitaldi antolatzea (bat herrialde bazkide bakoitzeko); 2 Eskualde Arteko Hedapen-ekitaldi antolatzea (Finlandian eta Espainian); 2 Eskualde-arteko Tailer antolatzea ezagutzak transferitzeko (Frantzian eta Italian, Politecnico di Torinon); webgune bat eta sare sozialak sortzea, hala nola Facebook, Linkedin eta kanal bat YouTuben.
2023ko martxoaren 29an proiektuko bazkide diren erakunde guztiak bildu ziren lehen bilera egiteko online bidez. Bertan, lehenengo jarduerak koordinatu eta Hungariara lehen Ikasketa Bisita antolatu zuten, 2023ko ekainaren 20tik 22ra burutu zutena.
Hungariako bisitan, proiektuko bazkide diren erakundeek Hajdú-Bihar eskualdeko jardunbide egokiak ezagutu ahal izan zituzten, hala nola, Derecske Adventure Garden edo Hortobagyi Parke Nazionala, UNESCOren Munduko Ondare gisa hartua 1999tik, non Hungariako estepako artzainen natura- eta kultura-ondareari balioa ematea nabarmentzen den. Leartibai Fundazioko teknikariekin batera, Urremendi eta Jata-Ondo landa garapenerako elkarteek parte hartu zuten erakunde laguntzaile gisa. Fundazioak haiekin lankidetzan jardun zuen turismo-proiektuetan, turismo-arloko arduradunen bitartez.
