Oinarri hauen helburua da Euskal Autonomia Erkidegoko enpresek programatutako prestakuntza-ekintzak (prestakuntza-ekintza estrategikoak) garatzeko laguntza ekonomikoak arautzea, langileen gaitasunak eta kualifikazioak hobetzeko 2025ean eta 2026an.
Erakunde onuradunak
Enpresek eta enpresa-taldeek jaso ahal izango dituzte laguntzak (35 langile edo gehiago badituzte), deialdi honetan jasotako baldintzetan, eta langileek prestakuntza-ekintzetan parte hartu ahal izango dute.
Diruz lagun daitezkeen jarduerak
Prestakuntza-ekintzatzat hartzen da enpresaren prestakuntza-proiektuan (prestakuntza-plana) kokatutako irakatsi eta ikasteko prozesua, parte-hartzaile guztientzat komunak diren helburu, eduki eta iraupen sistematizatuekin.
Oro har, prestakuntza-ekintzek, banakakoek zein taldekoek, gutxienez 6 orduko iraupena izango dute parte-hartzaile bakoitzeko, eta gehienez 270 ordukoa. Prestakuntza-ekintzak ezin izango dira, inola ere, egunean 8 ordutik gora eman.
Prestakuntza-ekintzak modalitate hauetakoren batean eman beharko dira: aurrez aurre, teleprestakuntzan edo mistoan.
Laguntzen zenbatekoa
Laguntzaren gehieneko ehunekoa % 90ekoa izango da, eta gutxienekoa % 60koa, aurkeztutako espediente bakoitzak lortutako puntuazioaren arabera.
Laguntzak ordaintzea
Dirulaguntza bi zatitan ordainduko da, honela:
- Lehenengo ordainketa, dirulaguntza osoaren % 50ekoa, Lanbide-Euskal Enplegu Zerbitzu Publikoak lehenengo prestakuntza-ekintzaren hasierako jakinarazpena jasotzen duenean.
- Bigarren ordainketa, dirulaguntzaren gainerakoa, justifikazio-memoria Lanbide-Euskal Zerbitzu Publikoan aurkeztean eta dagokion azken likidazioa onartzean.
Gauzatzeko epea
2025eko urtarrilaren 1etik 2026ko ekainaren 30era bitartean egiten diren prestakuntza-ekintzak finantzatu ahal izango dira. Nolanahi ere, prestakuntza-ekintzetako bat, gutxienez, 2025eko ekitaldian hasi beharko da.
Justifikatzeko epea
Emandako laguntza 2026ko uztailaren 31 baino lehen justifikatu beharko da.