Erakunde onuradunak

Administrazio-egoitza Euskal Autonomia Erkidegoan duten pertsona fisikoek eta egoitza soziala edo gutxienez jarduera-zentro bat Euskal Autonomia Erkidegoan duten pertsona juridikoek eskuratu ahal izango dituzte programa honen xede diren dirulaguntzak.

Diruz lagundu daitezkeen jarduerak

Diruz lagundu daitezkeen jardueratzat hartuko dira eskatzailearen ohiko eginkizunez bestelako jarduerak diren proiektuak, baldin eta ekintzailetzaren euskal ekosistema bultzatu eta hobetzea badakarte, eta, horretarako, eskaera aurkezteko ekitaldi berean hasi diren eragile publiko eta pribatuei eragiten badiete, honako gai hauei dagokienez:

• Ekintzailetzaren kultura eta balioak:
  • Inkonformismo-, proaktibitate- eta sormen-balioak sustatzea, ekonomia- eta gizarte-sarea berreskuratzeko eta iraunarazteko mekanismo gisa.
  • Nahi diren jarrera eta balioen adibide diren ekintzailetza-ereduak ikusaraztea, adibide positiboen zabalkundea, porroten normalizazioa eta desinformazioaren aurkako borroka bultzatuz.
• Giza kapitala:
  • Ekosisteman eskatzen diren profil profesional berrien eskaintza eta eskaria enpresek, startupek, ZTB – Teknologia eta Berrikuntza Zentroek eta eragile publikoek lotzea, profesionalak erakartzea barne, bereziki RIS3 – Regional Innovation Strategy for Smart Specialization eremuetan.
  • Belaunaldi-erreleboarekin zerikusia duten ekimen ekintzaileei laguntzea, hala nola ekintzailetzarako eta ehun ekonomikoa gaztetzeko palanka.
• Ekintzailetzaren iturriak eta ideiak:
  • OTEBBei – Enpresa Berritzaile Berriak eta Oinarri Teknologikokoak, batez ere RIS3 – Regional Innovation Strategy for Smart Specialization sektoreetan laguntzearen aldeko apustuari jarraipena ematea, eta EAEn egiteke dagoen trantsizio hirukoitza bultzatzea maila teknologiko-digitalean, energetiko-ingurumenekoan, demografikoan eta sozialean, enpresa, produktu eta zerbitzu berrien iturri gisa, etab.
  • Ekintzailetza parekidearen eta homogeneoaren aldeko apustua, emakumeen ekintzailetzari arreta berezia eskainiz.
• Merkaturako sarbidea:
  • Elkarlaneko ekintzailetza sustatzea, merkaturako sarbidea eta iraunkortasuna errazteko.
  • Ekintzaileen eta enpresaburu/zuzendari erretiratu edo aurre-erretiratuen inplikazioa proiektu ekintzaileei laguntzeko, merkaturatzeko.
• Ekosistema:
  • Euskadiren posizionamendua indartzea, ekiteko lurralde erakargarri gisa eta industria-ekintzailetza teknologikoaren ekosistema gisa.
  • Euskal ekosistemaren nazioartekotzea eta kanpo-ikuspena (haren eragileak, jarduera).

Diruz lagundu daitezkeen gastuak

Diruz lagundu daitezkeen gastutzat hartuko dira aurreko artikuluan deskribatutako gaiekin zerikusia duten guztiak, baldin eta proiektua gauzatzeko hirugarrenek egindako lanei badagozkie (mugatzeko asmorik gabe, proiektua diseinatzeko eta planifikatzeko gastuak, espazioak alokatzea, aholkularitza, tresnak eta/edo plataforma digitalak diseinatu eta egitea).

Ez dira diruz laguntzeko moduko gastutzat hartuko onuradunaren baliabideei dagozkienak (mugatzeko asmorik gabe, onuradunaren langileei lotutako kostuak, hala nola soldatak edo mantenua ordaintzea, bertako langileen joan-etorriak eta ostatuak), taldeko enpresenak barne.

Diruz lagundu daitezkeen gastuak baloratzeko, irizpide hauek hartuko dira kontuan:

• Proiektua gauzatzeko beharrezkoak izan beharko dute.
• Laguntza-eskaera SPRIn aurkezten denetik aurrera eta proiektua gauzatzeko ezarritako epean sortutakoak edo fakturatutakoak. Epe hori 12 hilabetekoa izango da, gehienez, proiektua hasten denetik aurrera.
• 2025eko urtarrilaren 1etik aurrera hasitako proiektuen laguntza-eskaera aurkeztu aurretik sortutako edo fakturatutako gastuak onartuko dira, baldin eta eskaera horiek oinarri hauek EHAAn argitaratu eta bi hilabeteko epean aurkezten badira.

Laguntzen zenbatekoa

Onuradunaren tipologiaren arabera eta, nolanahi ere, gehienez 10.000 euro onuradun bakoitzeko:

• Pertsona fisikoa, elkartea, fundazioa eta unibertsitatea: % 80.
• ETEak (mikroenpresen eta enpresa txiki eta ertainen definizioari buruzko Batzordearen 2003ko maiatzaren 6ko 2003/361/EE Gomendioaren arabera): % 60.
• Enpresa handia: % 50.

Laguntzaren ordainketa

Dirulaguntzak SPRIk ordainduko ditu, laguntzaren erakunde onuradunari ordainketa bakarra eginez.

Gauzatzeko epea

Proiektua gauzatzeko ezarritako epea 12 hilabetekoa izango da gehienez, proiektua hasten denetik zenbatzen hasita.

Justifikatzeko epea

Likidazio-eskaera proiektua amaitu eta gehienez 2 hilabeteko epean aurkeztu beharko da, eta, nolanahi ere, 2026ko urriaren 30a baino lehen.