Deialdi honen xedea da Euskal Autonomia Erkidegoko enpresek beren langileen gaitasunak eta kualifikazioak hobetzeko programatutako prestakuntza-ekintzak (prestakuntzako ekintza estrategikoak) garatzeko 2022. urterako diru-laguntzen oinarriak ezartzea.
Erakunde onuradunak:
Enpresak eta enpresa-taldeak izan daitezke laguntzen onuradun, deialdi honetan jasotako baldintzetan, eta langileek parte har dezakete prestakuntza-ekintzetan.
Prestakuntza-ekintzak:
Deialdi honen ondorioetarako, prestakuntza-ekintzatzat hartuko da enpresaren prestakuntza-proiektuaren (Prestakuntza Plana) barruko irakaskuntza-ikaskuntza prozesua, parte-hartzaile guztientzat komunak diren helburu, eduki eta iraupen sistematizatuekin.
Oro har, prestakuntza-ekintzek, banakakoek zein taldekoek, gutxienez 6 orduko iraupena izango dute parte-hartzaile bakoitzeko, eta gehienez 270 ordukoa. Muga hori salbuetsi ahal izango da, baldin eta beharrezkoa dela justifikatzen bada.
Diruz lagun daitezkeen gastuak:
- Enpresatik kanpoko prestakuntza-zerbitzuen kontratazioari dagozkion kostuak.
- Barneko prestatzaileen kostua.
- Material suntsikorraren kostua, babes- eta segurtasun-materiala barne. «Teleprestakuntzaren» kasuan, prestatzaileen eta parte-hartzaileen artean erabilitako komunikabideei egotz dakizkiekeen kostuak finantzatu ahal izango dira, ekintzaren kostu osoaren ehuneko 10 gehienez ere.
- Material didaktikoen kostua.
- Prestakuntzan ari diren langileen asegurua. Gastu horiek behar bezala banakatuta aurkeztu beharko dira prestakuntza-ekintzaren arabera, eta parte-hartzaile kopuruaren arabera egotziko dira.
- Amortizazioak, prestakuntza-ekintza bakoitzari egotz dakiokeen proportzioan, eta prestakuntza-ekintzen garapenari egotz dakizkiokeen instalazioen eta ekipamenduen alokairuak.